कारागारमा गोली चलेको रात तीन सहयोगी काठमाडौंमै थिए

केपी ढुंगाना, काठमाडौं, चैत ४- चार जनाको समूहका आएका भारतीय नागरिकले युनुस अन्सारीको हत्या योजना बनाएको खुलेको छ। एक साता लामो अनुसन्धानपछि अनुसन्धानमा संलग्न प्रहरी अधिकारीहरु घटनामा चार जना संलग्न रहेको निष्कर्षमा पुगेका हुन्। प्रहरीले कारागारभित्र पेस्तोल बोकेर युनुसलाई गोली हान्ने जसजित सिंहसंग अन्य २ जना सहयोगी रहेको घटनाकै दिन पत्रकार सम्मेलन गरेर जानकारी दिएको थियो।

भारतीय नागरिक सुरेस द्धिवेदी र रामु द्धिवेदी सिंहको नाम सार्वजनिक गर्दै सूचना दिनेलाई ५० हजार पुरस्कारको घोषणा गरेका थिए। उच्चस्रोतका अनुसार घटनामा थप एक जना संलग्न रहेको खुलेपनि प्रहरीले विवरण भने सार्वजनिक गरेको छैन।

गत बिहीबार जाली भारु र खैरो हेरोइनको कारोवारमा संलग्न रहेको अभियोग १४ महिनादेखी केन्द्रिय कारागारमा बन्दी रहेका युनुसमाथी कारागारभित्रको बन्दी भेटघाट कक्षमा गोली प्रहार भएको थियो। सामान्य उपचारपछि युनुसलाई कारागार फर्किएसकेका छन्।

साढे ११ बजे केन्द्रीय कारागारभित्रैबाट सिंह पक्राउ परेपछि प्रहरीले उनको भक्तपुरको बोडेमा रहेको घरमा छापा मारेको थियो। प्रहरी स्रोतका अनुसार कारागारमा गोली प्रहार भए लगत्तै पक्राउ परेका सिंहले प्रहरीलाई असहयोग गर्दा घटनाका अन्य सहयोगी फरार भएका थिए।

एक प्रहरी अधिकारीका अनुसार सिंहले बोडेमा डेरा रहेको बताए लगत्तै प्रहरी टोली छापामार्न बोडे पुगेको १० मिनेट अगाडि उनीहरु कोठावाट मोटरसाइकलमा फरार भएका थिए। स्रोतले भन्यो' प्रहरी पुग्नु १० मिनेट अगाडि मात्र उनीहरु कोठावाट बाहिरिएर मोटरसाइकलमा फरार भएको खुल्यो।'अनुसन्धानकाक्रममा उनी घटनाको दिन उपत्यकामै बसेर भोलीपल्ट स्थलमार्गवाट काठमाडौंवाट बाहिरिएका थिए। अनुसन्धानकोक्रममा घटनामा संलग्न केही ब्यक्ति ठमेलको गेष्ट हाउसमा बसेको खुलेपछि प्रहरीले छापा मारेपनि केही विवरण फेला पार्न सकेको छैन।

प्रहरीले घटनामा संलग्न रहेको अभियोगमा ९ जनालाई पक्राउ गरी हिरासतमा राखेको छ। हिरासतमा राखिएका ८ जना नेपाली नागरिक हुन्। स्रोतका अनुसार पक्राउमध्ये चार जनालाई जसजित समुहले सहयोगीको रुपमा परिचालन गरेका थिए भने २ जना मोटरसाइकल भाडामा दिने ब्यक्ति हुन्।

जसजित र उनका सहयोगीले प्रयोग गरेको बा २९ प ९६५७ र बा ४० प ४१६१ नम्बरको मोटरसाइकल शनिवार लावारिस अवस्थामा गौशालामा फेला परको थियो। अनुसन्धान अगाडि बढाउँदा मोटरसाइकल ठमेलवाट भाडामा लिएको खुलेको थियो।

मोटरसाइकल भाडामा दिने ब्यक्तिले उनीहरुको परिचय खुल्ने कुनै कागजपत्रनै नराखी मोटरसाइकल भाडामा दिएको खुलेपछि प्रहरीले २ जना मोटरसाइकल सञ्चालक र एक जना जमानी बस्ने ब्यक्तिलाई पक्राउ गरी हिरासतमा राखेको छ। यस अगाडि जमिम शाहको हत्यामा संलग्न समुहले कुनै कागजपत्रविनानै मोटरसाइकल किनेका थिए।

घटनाको पृष्ठभूमि र संलग्नहरुबारे धेरै तथ्यहरु खुलीसकेको अनुसन्धानमा संलग्न प्रहरीस्रोत दावी गर्छ। अधिकांश तथ्यहरु आईसकेका छन्, अब त्यसको पुष्टीको चरणमा छौं।'

महानगरीय प्रहरी अपराध महाशाखाका प्रमुख तथा युनुस गोलीकान्डका अनुसन्धान समितिका संयोजक हेमन्त मल्लले'अनुसन्धान सकारात्मक प्रगतीउन्मुख' रहेको बताए। 'अहिले हामी विभिन्न कोणवाट घटनाको विष्लेशण र संलग्नहरुबारे अनुसन्धान गरिरहेका छौं,उनले भने'अहिले हामी अभियुक्तको बयान र विष्लेशणमा केन्द्रित छौं।'

भारतीय कैदी अनुसन्धानको घेरामा

युनुसमाथि भएको गोली प्रहारको घटनाको अनुसन्धानमा खटिएको प्रहरी टोलीले नेपाली कारागारमा रहेका अन्य भारतिय बन्दीको गतिविधी सम्बन्धमा समेत अनुसन्धान शुरु गरेको छ।

कारागारभित्र गोली हाने लगत्तै पक्राउ परेका सिंहले कारागारमा रहेका चाल्श शोभराज र अमर टन्डन र अन्य कारागारका भारतीय बन्दीसँग समेत भेट गरेको देखिएपछि प्रहरीले सिंहसंगको सम्बन्धबारे अनुसन्धान शुरु गरेको छ। प्रहरीस्रोतका अनुसार केन्द्रीय कारागारका पप्पुदेवसंग सिंहको सम्बन्धबारे अनुसन्धान गरिरहेको छ।

केन्द्रीय कारागारमा युनुससंगै,चाल्श, टन्डन र पप्पुलाई भेट्न आएका आगन्तुकहरुको अनुसन्धानका लागी अपराध महाशाखाले कारागारको आगन्तुक दर्ता पुस्तिकाको अध्ययन शुरु गरेको छ।

स्रोतका अनुसार ६ राउन्ड गोली लोड गरेर कारागारभित्र प्रवेश गरेका उनले चार राउन्ड गोली प्रहार गरेका र पूर्ण तयारीका साथ कारागार प्रवेश गरेपनि कमसल गोली बोकेकाले घटनाका सिंहको उदेश्यबारे समेत अन्यौल देखिएको छ।

'हत्याका लागि जोखिम मोलेर कारागार पुगेका उनले किन कमशल गोली बोकेका थिए' एक अधिकृतले भने'गोली प्रहार गर्दा चार राउन्डसम्म मिस फायर गरेको र कमशल गोली प्रयोग गरेकाले कतै आतंक फैलाउने मनशाय त हैन?' सिंहले बयानमा सोही दिन गोली पाएकाले गोलीको गुणस्तर थाहा नपाएको बयान दिएका छन्।'कमजोर गोली ल्याएका रहेछन्, प्रहार गर्दा धेरै चुक भयो' सिंहको बयान उदृत गर्दै स्रोतले भन्यो।

जाली भारुको कारोवारमा सक्रिय युनुसको सम्बन्ध पाकिस्तानी शंकास्पद समुहसंग देखिएको र पाकिस्तानवाट आएको २ खेप जाली भारु पक्राउ परेकाले सोही समुह घटनामा संलग्नताका सम्बन्धमा समेत अनुसन्धान केन्द्रित रहेको एक अधिकारीले बताए।

युनुसको हत्याका लागी दुबईमा रहेका अली अध्यक्षसँग १५ लाख भारु मा डिल गरेर उनको हत्याका लागी नेपाल आएको सिंहले दावी गरेपनि प्रहरीले अलीको बारेमा कुनै जानकारी संकलन गर्न सकेको छैन।

अनुसन्धानमा संलग्न प्रहरीस्रोतका अनुसार उनी एक महिना अगाडिमात्र काठमाडौं आएको दावी गरेपनि काठमाडौंका धेरै स्थानबारे जानकार रहेकाले उनी लामो समयदेखी नेपालमा बसेको देखिएको छ।  Source: Nagarik news